Framhaldsskólinn á Laugum 

Starfsfólk Framhaldsskólans á Laugum skoraði í gær á útskriftarnema í íþróttakeppni í íþróttahúsinu í dag kl. 16.30. Keppnisgreinar verða bogfimi, blindrabolti og blak. Það lið sem vinnur 2 greinar vinnur keppnina. Undir er skrifað "Mætið ef þið þorið - Starfsfólk FL". Útskriftarnemar hafa tekið áskoruninni og verður spennandi að sjá hvernig keppnin fer. Útskriftarnemar voru með dimiteringu í dag og tóku daginn snemma þegar þeir fóru í vagni aftan í dráttarvél á milli heimila kennara og vöktu þá með látum. Þeir höfðu svo tekið kaffistofu starfsmanna í gegn og snúið þar öllu við og merkt hvern einasta hlut með "post-it" miða, allt frá kaffipokum, stólum, loftljósum og rúðum yfir í blöð sem hengu á minnistöflu. Starfsfólkið fékk svo afhent nafnspjöld í morgun þar sem mátti sjá titla á borð við Barbie, Ken, Pamela Anderson, Jóakim aðalönd, Stiffler's mom og David Attenborough. Þá höfðu útskriftarnemar hengt blöð með myndum af sér úr Morkinskinnu upp á töflu þar sem þeir þökkuðu fyrir sig með góðum kveðjum, eins og sjá má á meðfylgjandi mynd. Nokkrir hafa fengið að fljúga í tjörnina í dag, einn kennari og nokkrir nemendur. Þessi næstsíðasti dagur skólaársins hefur því verið venju fremur viðburðaríkur og honum hvergi nærri lokið þegar þetta er skrifað.

Morkinskinna, ársrit Nemendafélags Framhaldsskólans á Laugum, kom í hús um hádegisbil í gær, nemendum og starfsfólki til mikillar ánægju. Á meðfylgjandi mynd er Fjölnir Jónsson með fyrstu Morkinskinnuna 2012. Í bókinni eru myndir af nemendum og starfsfólki auk þess sem nemendum bauðst að senda inn svör við nokkrum spurningum, svo sem hvað nemendur töldu vera eftirminnilegast frá vetrinum.