Framhaldsskólinn á Laugum 

Árshátíð Framhaldsskólans á Laugum var haldin í félagsheimilinu að Ýdölum síðasta föstudag, en til stóð að halda hana á Breiðumýri en vegna mikils fjölda hátíðargesta þótti ráðlagt að færa hátíðina. Árshátíðin hófst með karókí keppni milli borða til að skera úr um hvaða borð fengi fyrst að fá sér að borða. Fjölnir Jónsson, forseti nemendafélagsins, tilkynnti svo að veislustjóri kvöldsins myndi gera úrslitin kunngjör, sem var, öllum að óvörum, Helga Braga Jónsdóttir. Kom hún dansandi inn á sviðið í fullu fjöri við mikið lófaklapp og köll frá árshátíðargestum. Helga Braga kunni svo sannarlega að skemmta lýðnum og var henni afar vel tekið.

Kristján kokkur og hans föruneyti hafði borið þvílíkar kræsingar á borð og rann maturinn ljúflega ofan í veislugesti. Stjórn nemendafélagsins tilkynnti úrslit úr kosningum sem haldnar voru fyrr í vikunni þar sem meðal annars var kosið um herra og frú fyrir hverja vist, ásamt fleiri skemmtilegum titlum. Vistaratriðin voru öll nema eitt í formi myndbands og meira að segja starfsfólkið var með myndband, ásamt því að syngja á sviði. Dómnefnd tilkynnti svo úrslit í vistarkeppninni og var það neðrihæð Tröllasteins sem vann að þessu sinni með skemmtilegu myndbandi. Skólahljómsveitin The Babes hélt svo fjörinu uppi eftir að borðhaldi lauk. Til að hita upp fyrir ballið dró Helga Braga nokkra gesti upp á svið og fékk þau til að dansa hressilega með sér.

Skemmtileg árshátíð skemmtilegra nemenda og skemmtilegra starfsmanna í skemmtilegum skóla!